21 İYUL 2023

“Özünü hepatitdən qoru!” mövzusunda təşviqat aksiyası keçirildi

Səhiyyə Nazirliyinin İctimai Səhiyyə və İslahatlar Mərkəzi (İSİM) tərəfindən Yasamal Rayon İcra Hakimiyyəti ilə birgə 21 iyul 2023-cü ildə Hüseyn Cavid Parkında əhali üçün təşviqat aksiyası keçirildi. İctimaiyyət nümayəndələri və könüllülərin fəal iştirak etdiyi aksiyanın məqsədi əhalini hepatit virusları barədə məlumatlandırmaq idi. 28 iyul – Ümumdünya Hepatit Günü ərəfəsində keçirilən aksiyada iştirakçılara hepatit virusunun bütün növlərinə yoluxma, xəstələnmə göstəriciləri və bu sahədə görülən tibbi tədbirlər barədə dolğun məlumat verildi. Vurğulandı ki, xəstəliyə yoluxmamaq üçün steril şpris və iynələrdən, tatuaj və pirsinq zamanı birdəfəlik iynə və əlcəklərdən, dezinfeksiya olunmuş alətlərdən, şəxsi gigiyena vasitələrindən fərdi qaydada istifadə etmək lazımdır. Aksiya iştirakçılarına sağlamlığa məsuliyyətlə yanaşmaq, gigiyena qaydalarına riayət etmək, sağlam həyat tərzi seçmək tövsiyə olundu, İSİM tərəfindən hazırlanaraq nəşr edilən maarifləndirici materiallar paylanıldı.