14 İYUL 2023
Səhiyyə Nazirliyi İctimai Səhiyyə və İslahatlar Mərkəzi tərəfindən hazırlanan maarifləndirmə materialları müəssisələrə təqdim olundu
Səhiyyə Nazirliyi İctimai Səhiyyə və İslahatlar Mərkəzi (İSİM) tərəfindən hazırlanaraq nəşr edilən müxtəlif mövzulara dair maarifləndirici materialların səhiyyə və tibb müəssisələrinə, beynəlxalq təşkilatların ölkəmizdə fəaliyyət göstərən nümayəndəliklərinə, qeyri-hökumət təşkilatlarına paylanılması həyata keçirilib. Cari ilin yanvar-iyun ayı ərzində müvafiq olaraq müəssisələrə müxtəlif mövzulara dair 180 mindən çox 45 adda maarifləndirici materiallar (buklet, vərəqə, kitabça və s.), o cümlədən 35 adda kliniki protokollar təqdim olunub.
Əhali üçün nəzərdə tutulan maarifləndirmə materiallarında xəstəliklərin profilaktikası, sağlam həyat tərzi, zərərli vərdişlərin mənfi təsirləri, gigiyena qaydaları, ailə planlaşdırılması, məişət zorakılığının qarşısının alınması və digər mövzular barədə ətraflı məlumat və tövsiyələr yer alıb. Materiallar əlçatanlığın təmin olunması məqsədilə www.isim.az saytında resurslar bölümündə yerləşdirilib (https://www.isim.az/az/pages/20-Resurslar) .
İSİM tərəfindən tərtib olunan və Azərbaycan Respublikası Səhiyyə Nazirliyinin Elmi-Tibbi Şurası tərəfindən təsdiq olunan klinik protokollar hər hansı nozologiya və ya sindrom zamanı düzgün yardım göstərilməsi ilə bağlı qərar qəbul etməkdə həkimə kömək edən tövsiyələr toplusudur. Tibb işçiləri üçün qiymətli vəsait olan 91 klinik protokola, o cümlədən yenilənmiş 65 klinik protokola əlçatanlıq təmin olunub və saytda təlimatlar bölümünə yerləşdirilib (https://www.isim.az/az/reports/5).