15 İYUL 2016
İSİM-in əməkdaşı MEK-də maarifləndirmə məqsədilə keçirilən tədbirdə çıxış etdi
15 iyul 2016-cı il tarixdə Səhiyyə Nazirliyinin İctimai Səhiyyə və İslahatlar Mərkəzinin (İSİM) əməkdaşı həkim-metodist Nərgiz Kərimova Azərbaycan Milli Elmlər Akademiyasının (AMEA) Mərkəzi Elmi Kitabxanasında (MEK) maarifləndirmə məqsədilə təşkil olunmuş tədbirdə qadın orqanizmində hormonal pozulmalar və bu sahədə görüləcək profilaktik metodlar haqda məlumat verdi.
Kitabxana işçiləri və digər iştirakçıların qatıldığı bu tədbir "Ana və uşaqların sağlamlığının yaxşılaşdırılmasına dair 2014-2020-ci illər üçün Dövlət Proqramı"nın həyata keçirilməsi üzrə Azərbaycan Respublikası Səhiyyə Nazirliyinin Tədbirlər Planının 7.1-ci bəndinə müvafiq olaraq reproduktiv sağlamlıq barədə maarifləndirmə işinin həyata keçirilməsi məqsədilə təşkil olunmuşdu.
Tədbir iştirakçılarına həyatın bütün mərhələlərində “Qadının reproduktiv sisteminə hormonların təsiri” və “Qalxanabənzər vəzin qadın sağlamlığında rolu" mövzuları ətrafında mühazirələr oxundu.
Qadınların sağlamlığında maarifləndirmə işinin vacib olduğunu söyləyən natiq yeniyetmə yaşlarda, hamiləlik zamanı və klimaks dövründə qadının endokrin sistemində baş verən pozulmaların səbəbləri və əlamətlərindən danışaraq, vaxtında aparılan profilaktik tədbirlərin yaranmış xəstəliyin müalicəsindən həm maddi, həm də mənəvi cəhətdən daha asan olduğunu vurğuladı.
Tədbirin sonunda iştirakçıların sualları cavablandırıldı və onları maraqlandıran məqamlarla bağlı diskussiyalar aparıldı.