12 İYUN 2024
Məktəblərdə “Sağlam həyat tərzi. Sağlam qidalanma” mövzusunda təlimlər keçirilib
Səhiyyə Nazirliyinin İctimai Səhiyyə və İslahatlar Mərkəzi (İSİM) tərəfindən respublika üzrə müxtəlif təhsil müəssisələrində sağlam həyat tərzi və sağlam qidalanma üzrə maarifləndirici təlimlər təşkil olunub. Abşeron rayon Mehdiabad qəsəbəsi 3 nömrəli, Şəmkir rayon Yeni Həyat kənd və Gəncə şəhər 41 saylı tam orta məktəblərində müəllimlər arasında keçirilən təlimin məqsədi təhsil işçilərinin qeyri-infeksion xəstəliklərin əsas risk amilləri, zərərli vərdişlərin mənfi təsirləri barədə məlumatlılığının artırılması olub.
İSİM-in Səhiyyə kommunikasiyası şöbəsinin müdiri Laura Quliyeva zərərli vərdişlərin, qeyri-sağlam qidalanmanın sağlamlığa, inkişafa, fəaliyyətə, yaradıcılığa mənfi təsirlərini vurğulayıb.
İştirakçılara müəllimlər, şagirdlər və valideynlər üçün İSİM tərəfindən hazırlanaraq istifadəyə verilən “Sağlam uşaq” portalı və mobil tətbiqi geniş təqdim olunub, portalda sağlamlığın qorunması, sağlam həyat tərzi, sağlam qidalanmaya dair sübutlara əsaslanan müxtəlif çeşiddə məlumatların yer aldığı diqqətə çatdırılıb. Portalda yer alan çoxsaylı məqalə, video, infoqrafika, maarifləndirici oyunların müəllimlər tərəfindən şagirdlər və valideynlər arasında təbliğ edilməsi, eyni zamanda özlərinin də gənc nəslə nümunə olaraq sağlam həyat tərzinə üstünlük verməsi tövsiyə olunub. Onlara hər gün fiziki aktivliyə vaxt ayırmaq, sağlam qidalanmaq və gigiyena qaydalarına riayət etmək məsləhət görülüb.
Yekunda pedaqoji heyətə İSİM tərəfindən hazırlanaraq nəşr edilən maarifləndirmə materialları paylanılıb, onları maraqlandıran suallar cavablandırılıb.