12 İYUN 2023
İSİM festivalda iştirak etdi
Səhiyyə Nazirliyi İctimai Səhiyyə və İslahatlar Mərkəzi (İSİM) 11 iyun 2023-cü ildə Bakı İdman Sarayında keçirilən “GameSummit” oyun festivalında iştirak etdi. Azərbaycan və beynəlxalq kompüter, mobil oyunlar və bu oyunun tərtibatçıları ilə tanış olan iştirakçılara sağlam həyat tərzinin təbliği məqsədilə məktəblilərin internet portalı üçün İSİM tərəfindən yaradılmış maarifləndirici kompüter oyunları da təqdim olundu. Sağlam və düzgün qidalanmağı, zərərli vərdişlərdən uzaq olmağı, sağlam həyat tərzi seçməyi tövsiyə edən, qeyri-infeksion xəstəliklərin əsas risk amillərindən uzaq olmağı təbliğ edən bu maarifləndirici oyunlar məktəblilər və onların valideynləri tərəfindən maraqla qarşılandı. Tibbi maarifləndirmə məqsədilə İSİM tərəfindən əhali üçün yaradılan “Tütündən imtina et”, “Sağlam qida”, “Şəkərli diabet”, “Ürəyinizi qoruyun” və digər mobil tətbiqlər də iştirakçılara təqdim olundu.