16 DEKABR 2022
İSİM tərəfindən aparılan “Azərbaycanda özəl tibb fəaliyyəti üzrə sorğu”nun yekun nəticələri ilə bağlı dəyirmi masa oldu
İSİM-in direktoru Qəhrəman Haqverdiyev sorğunun nəticələri barədə geniş təqdimatla çıxış etdi. O, İSİM tərəfindən 2021-ci ilin sonu 2022-ci ilin əvvəli ölkəmizdə özəl tibb müəssisələri arasında aparılan bu sorğunun səhiyyə sektorunun inkişafındakı aktual məsələlərə, o cümlədən problemlərə nəzər salan ilk irimiqyaslı sorğu olduğunu bildirdi. Sorğunun məqsədi özəl tibb fəaliyyətində mövcud vəziyyəti, tibbi xidmətin keyfiyyətinin yüksəldilməsi, personal və pasiyentlərlə iş, icbari və könüllü sığorta, özəl təbabətdə informasiya texnologiyalarının tətbiqi və s. məsələləri öyrənmək idi.
Qeyd edildi ki, cəmi 108 sualın (o cümlədən İSİM ilə əməkdaşlıq haqqında 16 sual) yer aldığı sorğuya respublika üzrə fəaliyyət göstərən 61 özəl tibb müəssisəsi cəlb olundu və suallar müəssisə rəhbərləri tərəfindən cavablandırıldı. Sorğuya cəlb olunan tibb müəssisələrinin seçimi təsadüfi idi, sorğudan imtina nisbəti 3-5 faiz qeydə alındı. Dəyirmi masada sorğunun nəticələri geniş müzakirə olundu, iştrakçıları maraqlandıran suallar cavablandırıldı və ölkəmizdə özəl tibb fəaliyyətinin aktual məsələləri ilə bağlı səmərəli fikir mübadiləsi aparıldı.