Səhiyyə Nazirliyi İctimai Səhiyyə və İslahatlar Mərkəzində (İSİM) 31 may 2022-ci ildə Ümumdünya Tütünsüz Gününə həsr olunmuş tədbir keçirildi. İSİM-in direktoru Qəhrəman Haqverdiyev giriş sözü ilə çıxış edərək bildirdi ki, hər il ölkəmizdə bu günlə bağlı bir sıra tədbirlər təşkil olunur: “Təbliğat və maarifləndirmə fəaliyyəti ilə yanaşı, bizim əsas vəzifəmiz innovativ və metodik materiallar yaratmaqdır. Tütünlə mübarizəyə həsr olunmuş iki internet saytı və üç mobil proqram hazırlamışıq – ikisi əhali üçün, digəri isə həkimlər üçün. Məmnuniyyətlə bildirirəm ki, əhalinin istifadəsinə verilən “Tütündən imtina et” mobil tətbiqi çox populyardır – artıq 10 mindən çox insan onu yükləyib”. İSİM-in Səhiyyə kommunikasiyası şöbəsinin müdiri Laura Quliyeva sağlam həyat tərzinin təbliği istiqamətində görülən işlərin, paytaxtda və regionlarda keçirilən maarifləndirici tədbirlərin əhəmiyyətini vurğuladı: “Səhiyyə işçiləri, ictimai səhiyyə mütəxəssisləri tütün məmulatlarından istifadənin sağlamlığa zərərlərindən söz açır və tütün tüstüsünün ətraf mühitə ziyanlı təsirlərinin azaldılması üçün birgə səy göstərməyi, həmrəy olmağı təbliğ edir”. İSİM-in İctimai sağlamlıq şöbəsinin müdiri Tofiq Musayev diqqətə çatdırdı ki, passiv tütünçəkmə tütün tüstüsü ilə çirklənmiş hava ilə nəfəs almaqdır və bu hər kəsin həyat və sağlamlığı üçün təhlükəlidir: “Ümumdünya Tütünsüz Gününün builki şüarı belədir: tütün ətraf mühit üçün təhlükədir. Bu təsadüfi deyil, çünki araşdırmalara görə, tütün tüstüsünün tərkibində 7 min zərərli kimyəvi maddə var”.

Səmərəli fikir mübadiləsi şəraitində keçən tədbirdə əhali arasında maarifləndirməyə verdiyi töhfəyə görə İdman TV-yə, “Siqaretə yox!” və “Sport 103” proqramlarının müəllif və aparıcısı Toğrul Səfərova “Təşəkkürnamə” təqdim olundu.