8 АПРЕЛЯ 2022
Gənclər reproduktiv sağlamlığın qorunmasına dair məlumatlandırıldı
Səhiyyə Nazirliyi İctimai Səhiyyə və İslahatlar Mərkəzi, Təhsil Nazirliyi Gənclərin Respublika Bədii Yaradıcılıq Evinin birgə əməkdaşlığı ilə təhsil müəssisələrində yeniyetmə və gənclərin sağlam həyat tərzi, reproduktiv sağlamlıq və ailə planlaşdırılmasına dair biliklərinin artırılması, təhlükəsiz cinsi davranış vərdişlərinin formalaşdırılması istiqamətində növbəti maarifləndirmə tədbiri keçirildi.
8 aprel 2022-ci il tarixdə Emal Sənayesi üzrə Bakı Dövlət Peşə Təhsil Mərkəzində tələbələr üçün “Yeniyetmələr və gənclər arasında təhlükəsiz reproduktiv sağlamlıq davranışları və sağlam həyat tərzi vərdişlərinin formalaşdırılması” mövzusunda tədbir təşkil olundu.
Təhsil Nazirliyi Gənclərin Respublika Bədii Yaradıcılıq Evinin Kütləvi tədbirlərin təşkili şöbəsinin müdiri Kəmalə Muradova gənclərə sağlam həyat tərzi seçərək zərərli vərdişlərdən uzaq olmaq tövsiyə etdi, gənc yaşlarda reproduktiv sağlamlığı qorumağın vacibliyini bildirdi.
Səhiyyə Nazirliyinin İctimai Səhiyyə və İslahatlar Mərkəzinin nümayəndəsi, həkim Afət Məmmədova geniş təqdimatla çıxış edərək, reproduktiv sağlamlığın əsas amillərindən söz açdı. O, fərdi gigiyena qaydaları, ailə planlaşdırılması və müasir kontraseptiv üsullar barədə ətraflı məlumat verdi, həmçinin abortların, erkən nikahların fəsadlarından bəhs etdi.
Yekunda iştirakçıları maraqlandıran suallar cavablandırıldı.